Terug na hoofblad
Wellington

Rolene Strauss praat by Lentetee

•Jaomi Zeeman

Een van Wellington se jarelange tradisies is sekerlik die Hugenote Hoërskool se Lentetee.  Hierdie geleentheid het weer op Saterdag 13 Oktober in die skoolsaal plaasgevind.

Soos in die verlede, is die saal in ‘n oase omskep deur die talle gasvroue wat elk hul tafels feestelik getooi het.  Pragtige en kreatiewe rangskikkings, heerlike eet- en drinkgoed, ongelooflike aandag aan detail en fyn porselein het die agtergrond vir ‘n heerlik kuieroggend geskep.  Die tafels het onder die lekkernye gekreun en daar is in eg vroulike tradisie gesellig saamgekuier.

Lorraine Kuun het in haar verwelkomingstoespraak melding gemaak van die goeie werk wat met die fondse wat tydens die Lentetee ingesamel word, gedoen word om die nood van behoeftige leerders by die skool te verlig.

Die spreker by die geleentheid was Rolene Strauss.  Sy is die Mej. Suid-Afrika van 2014 en het ons land in dieselfde jaar baie trots gemaak deur as Mej. Wêreld gekroon te word.  “Vrouwees, ma-wees, alles wees” was die tema van die inspirerende praatjie wat sy met die gaste gedeel het.

Volgens Rolene is die teenoorgestelde van moed, konformering.  Sy het gaste aangemoedig om hulself te vra wie hulle regtig is, trots te wees daarop en die moed te hê om getrou daaraan te bly.  Sy het die waardevolle lewenslesse wat sy al geleer het met die gaste gedeel.

“Die eerste ding wat ek geleer het, is om te kies om die moed te hê om myself te wees in plaas daarvan om die hele tyd te probeer om soos ander te wees.  Nog ‘n belangrike les is om te leer om soms nee te sê en ‘n bietjie selfsugtig te wees met jou tyd,” het sy gesê.

Sy het haar praatjie met interessante video-insetsels en staaltjies uit haar eie lewe toegelig.  Rolene het verduidelik dat sy nie in “multi-tasking” glo nie.

“Ek het geleer dat, wanneer ‘n mens met te veel dinge op ‘n slag besig is, jy nie een daarvan ordentlik kan doen nie.  Ek glo eerder in chunking, wat behels dat ‘n mens een ding op ‘n slag ordentlik afhandel,” het sy gesê.

Volgens Rolene is vroue dikwels onseker oor hulself en ag hul hulself soms minder as wat hul werd is.

“Ons vrouens het soveel onsekerhede.  Ek het geleer dat daar ‘n paar dinge is wat jy in plek moet hê om hierdie probleem aan te spreek.  Jy moet ‘n goeie ondersteuningstelsel hê en ophou om jouself met ander te vergelyk.  Die lewe is nie ‘n kompetisie nie.  Dit help ook om jou sin vir humor in moeilike omstandighede te behou.

"Om ‘n seëning vir iemand anders te wees en altyd te probeer om net jou beste te doen, is nog dinge wat help om jouself in ‘n meer positiewe lig te sien.  Laastens is die liefde iets wat ook hiermee kan help - ook liefde vir jouself,” het sy gesê.

Rolene het met ‘n aanhaling van Psalm 139 afgesluit, ‘n gedeelte wat daarop wys dat die mens wonderlik geskape is en iets wat vir haar baie betekenis het.

Die dames is verder vermaak met die sang van drie hoërskooldogters en ‘n modevertoning van die matrieks se matriekafskeidrokke.

Hillary nou BADISA se ambassadeur

Die Wellingtonner Hillary Geslin se verhaal van hoop, deursettingsvermoë en die waar word van drome het reeds baie mense geïnspireer en aangegryp.  Hierdie matriekleerder het bo haar omstandighede uitgestyg en op 17-jarige ouderdom ‘n internasionale motiveringsboek geskryf wat deur ‘n Amerikaanse uitgewer uitgegee is.  Sy was ook verlede jaar die eerste ontvanger van die Winnie Rust-toekenning.

Hillary is onlangs as ‘n ambassadeur vir BADISA, ‘n organisasie wat professionele maatskaplike welvaart- en ontwikkelingsprogramme aanbied, verkies.  Haar eerste kennismaking met BADISA was tydens ‘n funksie by die Huis Andrew Murray Kinder- en Jeugsorgsentrum waar sy as motiveringspreker opgetree het.  Sy is daarna gevra om as geleentheidspreker by BADISA se Algemene Jaarvergadering in Bellville op te tree, waar sy haar verhaal met onder meer onderwysers, joernaliste en bekendes soos die bekroonde sopraan, Zanne Stapelberg, gedeel het.

“Ek het ‘n week na my toespraak by BADISA se algemene jaarvergadering ‘n e-pos van die CEO van die organisasie ontvang waarin daar gesê is dat hulle my as ambassadeur van BADISA, sowel as die BADISA Children’s Foundation verkies het,” vertel sy.

Volgens Hillary moet sy as ambassadeur waarde tot mense se lewens toevoeg.

“Vir my beteken dit om na mense te kyk soos wat hulle is, hulle potensiaal raak te sien en hulle nie te oordeel bloot op grond van waar hulle vandaan kom nie.  Almal het een of ander tyd ‘n helpende hand nodig.  ‘n Mens sal verbaas wees om te sien hoe iemand sy potensiaal begin uitleef en hoe iemand begin blom, net omdat jy die beste van hulle geglo het,” sê sy.

Volgens Hillary het haar eie paadjie en ondervinding haar geleer dat ‘n mens ander opreg moet behandel en waardeer vir wie en wat hulle is.

“As ambassadeur moet jy elke mens benader met die houding dat jy iets by hom of haar kan leer.  Dikwels leer ‘n mens die kosbaarste lesse by die onwaarskynlikste mense.  Dit is baie belangrik vir ‘n ambassadeur om mense beter te behandel as wat hulle jou behandel.  Waar jy ookal met mense te doen het, maak nie saak wie en wat hulle is nie, leef jou mens-vaardighede uit.  Die lewe is só klein en ons kry mekaar nodig op die eenvoudigste maniere,” deel sy haar filosofie.

Hillary voel ook dat dit belangrik is om respek vir almal te hê en om nooit iemand se integriteit ongegrond te bevraagteken nie - dit mag dalk ‘n weerspieëling van jóú integriteit wees.  Sy voel verder dat ‘n mens nooit iemand, ongeag rykdom, armoede of status, sommer net te klassifiseer nie.

Vir Hillary is dit asof die lewe in vooruitbepaalde sirkels loop.  Die feit dat ‘n onderwyseres by Wellington Hoërskool, Lindzey Deelman, vir Hillary gedurende ‘n moeilike tyd in haar lewe na BADISA verwys het, het, ten spyte van die feit dat sy nooit van hul diens gebruik gemaak het nie, ‘n tipe vooruitwysing na haar betrokkenheid by dié instansie geword.

Hillary voel ook dat elke mens ‘n unieke bydrae het om in die lewe te lewer.

“Elke persoon wat in die lewe gebring word, verteenwoordig iets nuuts, iets wat nooit van tevore bestaan het nie, iets oorspronkliks en uniek.  Dit is elke persoon se plig om te weet dat daar nog nooit iemand soos jy ter wêreld was nie.  My lewe is een van eenvoud en nederigheid en ek verkies dit so.  Celebrity-status is ‘n gevaarlike ding.  Dis valse sekerheid wat jou in ‘n delikate gemaksone plaas en iets wat in ‘n oogwink jou grootste vyand kan word. Dis verrykend om mense te ontmoet wat, ondanks hul bekendheid en rykdom, eenvoud nastreef en die kleiner maar die dieper dinge in die lewe waardeer.  Ek dink elke mens het ‘n kwota voorregte in die lewe gekry,” sê sy.

Hillary weier dat haar verlede en herkoms haar toekoms bepaal.

“Ek neem verantwoordelikheid vir waar ek in my lewe is.  Ek moes langs die pad uit my eie foute leer.  Ek leer steeds.  Dis hoe jy ook jou weg sal vind, deur soms verkeerde afdraaie te kies en op onnodige paaie te beland.  Dis die enigste manier om die regte roete te onthou.  My omstandighede het my geleer om dapper te wees en ek is dankbaar vir elke oomblik,” sê sy.

“Veral bruin mense het baie hulp nodig.  Daar is soveel probleme, die struggle oor die ekonomiese skeidslyne is met so baie dinge vermeng.  My droom en toekomsplan is om vir elke persoon geleenthede te wys om hulle volle potensiaal uit te leef, maak nie saak of jy die skool verlaat het nie, almal van ons is ewe belangrik.  Terwyl ‘n mens in armoede leef, voel jy soos ‘n mislukking.  Later begin glo jou brein alles wat jy dit voed,” verduidelik sy.

  Háár brein het haar gelukkig langs die pad die regte dinge laat begin glo.  Daarom beplan Hillary om volgende jaar aan haar film te werk - iets waarby talle swaargewigte in die filmbedryf reeds betrokke is.  Sy wil ook graag verder gaan studeer en nog boeke skryf om mense te motiveer.

“Dit baat nie ons wag vir die president om verandering te bring in ons gemeenskappe nie. Die lewe in Egoli en Carterville het my geleer suffering builds character and creates hope. Ek is ‘n survivor, want ek moes leer om my kop en mond te gebruik om te oorleef. Regdeur my lewe het kennis en self-awareness my bemagtig om uit te hou en aan te hou.

Never give up.  Everything is possible. Maak nie saak of mense in jou droom glo nie,” sê hierdie inspirerende jong vrou.

Wellington Wyn-toerisme vier die herkoms van Pinotage

Die plaaslike wynroetes het op Saterdag 13 Oktober Internasionale Pinotagedag gevier deur hulde te bring aan professor Abraham Izak Perold, vader van hierdie trots Suid-Afrikaanse kultivar.

Volgens Annelize Stroebel, algemene bestuurder van Paarl en Wellington Wyn-Toerisme, kan ons streek trots aanspraak maak as die geboorteplek van Pinotage omdat Perold in 1880 in die vallei gebore is.

“Abraham Perold het ‘n onuitwisbare merk op die wynmaak-industrie gemaak en word wyd as die pionier van die moderne Suid-Afrikaanse wingerdboukunde beskou.  As die vader van Pinotage verdien hy sy plek in die Suid-Afrikaanse wynmaakindustrie en ons is baie trots op hierdie plaaslike ikoon.  Dit is daarom natuurlik dat Pinotage een van ons streek se mees suksesvolle kultivars is met produsente wat talle toekennings vir hul uitstekende Pinotage-variëteite inoes,” het sy gesê.

Perold het in Wellington gematrikuleer en ‘n beurs ontvang om in Duitsland te gaan studeer.  Nadat hy ‘n doktoraal in Chemie ontvang het, het hy na Suid-Afrika teruggekeer om as dosent aan die Universiteit van Kaapstad te werk voordat hy op ‘n regeringsmissie gegaan het om ander wingerdvariëte wat geskik vir die Kaap sou wees, te ondersoek.

Met sy terugkeer het hy 177 potensieël gepaste variëteite saamgebring .  Hy is as die eerste professor van wingerboukunde by die Universiteit van Stellenbosch aangestel en het later die dekaan van die Landbou Fakulteit geword.  Sy baanbrekerswerk het die suksesvolle kruising van Pinot Noir met Cinsaut, voorheen bekend as Hermitage, tot gevolg gehad en uiteindelik tot die plaaslike inheemse Pinotage kultivar gelei.

Professor Perold het na die Paarl teruggekeer om ‘n posisie by die KWV te beklee en sy nalatenskap leef steeds voort met ‘n wyn wat na hom vernoem is.  Perold is in 1941 oorlede en sy graf is by Augusta Kleinbosch.

Verskeie produsente in die vallei bied spesiale aktiwiteite om Internasionale Pinotagedag te vier.  Afslag-aanbiedinge, interessante Pinotage-parings, sowel as gratis  en interessante proe-geleenthede is maar ‘n paar van die dinge wat hierdie maand by plaaslike wynkelders met die viering van Pinotage geniet kan word.

Pinotage Langtafel vier plaaslike kultivar

•Jaomi Zeeman

Die inheemse pinotage druif en wyn is op Saterdag 6 Oktober tydens ‘n deftige, vermaaklike Pinotage Langtafel by die Bovlei lokaal van Wellington Wyne gevier.

Tydens hierdie geleentheid kon gaste by ‘n lang, keurig gedekte tafel aansit om verskeie aktiwiteite rondom en vorme van pinotage te geniet.

Die aand is met vonkelwyn en kuns afgeskop terwyl die son op ‘n perfekte Bolandse lentedag gesak het.  Plaaslike kunstenaars het hul kunswerke ten toon gestel en Salome Langmann het gaste met Pinotage verf vermaak.

Gaste kon met Pinotage verf en die effek van verskillende Pinotage-style op waterverfpapier sien.

Die kelners vir die aand was tien studente van die Pinotage Youth Development Academy en het ‘n wonderlike taak verrig.

Die Pinotage Assosiasie het ook die aand ondersteun deur ‘n paartjie van die plaaslike ABSA-tak na die geleentheid te nooi.

Hierdie samewerking spruit uit ABSA se groot rol as jaarlikse borg van die Pinotage Assosiasie.

Heidi Arhens van Creative Kwizeen het oudergewoonte die spyskaart saamgestel en as spysenier opgetree.  Gaste kon weglê aan geregte wat deur Pinotage geïnspireer is.  Die voorgereg van blomkool, feta en geroosterde peersop saam met brood, is met ‘n wit Pinotage gekombineer.  Die hoofgereg van fillet is saam met nog ‘n variant van Pinotage bedien, terwyl die kaasborde saam met ‘n Blush-weergawe van dié kultivar voorgesit is.

Die verskeidenheid soetgoed wat as nagereg gedien het, sowel as die roomys waarmee die gastronomiese ervaring van die aand afgesluit is, is ook saam met Pinotage variante bedien.

Die eenvoudig versierde tafels, wat met proefbuise gevul met tipiese aromas van pinotage, soos sjokolade, peper, naeltjies, drop, mango en vele meer, sowel as speelgoed-soldaatjies gespog het, het die herkoms van pinotage, sowel as die ontstaan van Wellington gevier.

Die slag van Waterloo, wat uiteindelik tot die hertog van Wellington se bekendheid gelei het, is deur die soldaatjies verbeeld.  Wellington Wines se Duke-wynreeks het ook ter ere hiervan sy ontstaan gehad.

Die plaaslike onderwyseres en sangeres, Ronel Saayman, het vir groot vermaak tydens die geleentheid gesorg en die gaste se voete laat jeuk.

Volgens Xania van der Merwe, bemarkingsbestuurder by Wellington Wines, was die geleentheid so ‘n groot sukses dat daar reeds navrae vir volgende funksie was.

Jou Goeie Nuus - Gratis - Koerant met 'n Verskil in die Swartland - Ons dien en bou © die courant hou kopiereg op alle inhoud van hierdie webwerf en geen deel daarvan mag sonder die bestuur se toestemming gekopieer word nie.