Terug na hoofblad
Wellington

Bergrivier se nuwe hoof vol planne

•Jaomi Zeeman

Die plaaslike Bergrivier Hoërskool spog met ‘n splinternuwe skoolhoof.  Anthony Cavernelis is die nuwe hoof wat vanaf 2019 die leisels by hierdie baken in ons dorp gaan vashou.  Alhoewel hy nuut in sy pos is, is hy allermins nuut in die dorp en die gemeenskap se bedrywighede.

Hierdie murg-en-been-Wellingtonner is opgewonde oor die nuwe uitdagings en hy is vol planne en drome vir Bergrivier Hoërskool.

“Ek het my skoolloopbaan by Pauw Gedenk Primêr begin en daarna is ek na Bergrivier Hoërskool waar ek in 1981 gematrikuleer het.

"Ek het my B.Ekon graad in 1984 en my Hoër Onderwysdiploma in 1985 aan die Universiteit van Wes-Kaapland voltooi en verwerf ook my B.Ed graad deeltyds in 1993 aan hierdie universiteit.

"Ek het my onderwysloopbaan in 1986 aan Bergrivier Hoërskool begin.  Ek is getroud met Angela en ons het drie kinders, Roscoe, Björn en Euclea,” vertel hy.

Anthony, wat al vir 33 jaar lank verbonde is aan Bergrivier Hoërskool en sedert 1999 as Departementshoof in handelsvakke optree, is in 2018 as die nuwe hoof van die skool, met ingang van 1 Januarie 2019, aangestel.

Vir hom was dit ‘n groot eer om as skoolhoof van hierdie bakermat in die dorp aangestel te word.

“My aanstelling beteken vir my baie aangesien ek ‘n kind van hierdie pragtige dorp is en omdat ek al so lank aan dié skool verbonde is as leerder en opvoeder.

"Dit was nog altyd my droom om prinsipaal te word van hierdie goeie skool wat baie naby aan my hart lê,” sê hy.

Anthony het, ten spyte van die realiteit van talle uitdagings, groot drome vir sy alma mater.

“My visie vir Bergrivier Hoërskool is dat elke ouer wat binne die omgewing van die skool bly, sowel as mense in die res van die dorp, binne die volgende drie jaar Bergrivier Hoërskool sal kies as die skool van hul keuse om hul kinders in te skryf.

"Ek wil ook bitter graag hierdie skool vestig as ‘n instansie van akademiese uitnemendheid.  Ek wil graag die volgende vestig by die leerders, opvoeders en nie-doserende personeel: skooltrots, respek, integriteit en dissipline.

"Die skool vier hierdie jaar sy 70ste bestaansjaar en ek hoop dat die gemeenskap ons in al ons aktiwiteite sal ondersteun,” sê hy.

As deel van hul 70ste feesvieringe sal daar op Sondag 20 Januarie 2019 om 09:00 ‘n Fees-Kerkdiens by VGK-Wellington in Mellingstraat, oorkant Pick ‘n Pay, gehou word.

Almal word hartlik uitgenooi om die diens by te woon.

Volgens Anthony is daar talle uitdagings wat elke skoolhoof die hoof moet bied.

Een van die grootstes bly egter finansies.

“Die swak ekonomie het ‘n invloed op almal en ouers is maar traag om skoolfooie te betaal.  Die skool kan net kwaliteit onderrig bied indien die hulpbronne voldoende is en die klasse nie so baie leerders bevat nie.

"Dit bly ‘n droom by ons skool om beheerliggaamposte te hê.

Onder die huidige omstandighede doen die skool goed.  Ek wil hierdie jaar graag die oud-studente betrek om die skool in dié verband te help. Die skoolbeheerliggaam sal ook definitief planne in plek stel om skoolfooie in te samel,” deel hy sy planne.

Anthony sê dat dit sy doel is om die skool in die regte rigting te stuur, die regte dinge te doen en altyd deursigtig, regverdig en konsekwent te wees.

Hy is ook ‘n man wat ‘n gemeenskapsmens is en al vir jare ‘n bydrae in ons dorp lewer.

Anthony is onder andere die voorsitter van die Wellington Tuinbouvereniging en kweek al vir dekades lank krisante.

Hy is ‘n gesinsman wat graag sport, veral sokker, op televisie kyk en hy is die Kerkvoog van die St. Alban en St. Augustine Anglikaanse Kerk in Wellington.

Nou staan hy aan die stuur van sy alma mater, Bergrivier Hoërskool - iets wat hy met trots, ywer en ‘n ware Wellington-hart aanpak.

Kookwater matriekuitslae vir Hugenote Hoërskool

se slimkop-tweeling

•Jaomi Zeeman

Carien Rossouw is nie alleen die dux-leerder van Hugenote Hoërskool nie, sy het boonop die beste prestasie in Wellington in die matriekeksamen van 2018 behaal.  Sy is egter nie die enigste slimkop in haar gesin nie.  Haar tweelingbroer, Willie, spog met die tweede beste punte in die dorp.

Hierdie twee skrander jongmense woon al hul lewe lank op Wellington.  Hulle het beide hul laerskoolloopbane aan Hugenote Laerskool voltooi voordat hulle by Hugenote Hoërskool ingeval het.  Hul ouers, Francois en Elmien, was altwee onderwysers, maar bedryf nou hul eie onderneming.

Carien en Willie voel baie tevrede met hul uitslae.

“Ek is baie bly dat ek die punte behaal het wat ek graag wou hê.   Ek is baie dankbaar vir my uitslae - ek wou net my bes doen en het nie met enigiemand anders as myself gekompeteer nie,” sê Carien.

“Ek voel trots op myself en my suster se prestasies, dit is ‘n eer om so goed te kon presteer,” laat Willie hoor.

 Carien spog met 7 onderskeidings.  Sy het 90% vir Engels Huistaal, 83% vir Afrikaans Huistaal, 87% vir Wiskunde, 96% vir Geografie, 90% vir Biologie, 94% vir Lewensoriëtering en ‘n ongelooflike 99% vir Geskiedenis gekry.

Willie se punte lyk ewe indrukwekkend.  Hy het 78% vir Afrikaans Huistaal, 80% vir Engels Huistaal, 89% vir Wiskunde, 80% vir Lewensoriëntering, 92% vir Rekenaartoepassingstegnologie, 90% vir Ingenieursgrafika en -ontwerp en 90% vir Fisiese Wetenskappe behaal.

Volgens Carien was Wiskunde en Geskiedenis haar gunstelingvakke.

“Ek het nie regtig omgegee om Geskiedenis te leer nie, want dit was ‘n storie, dit maak sin.  Ek is mal daaroor om meer uit te vind oor die wêreld se geskiedenis en hoekom dinge gebeur het soos wat dit gebeur het en wat die gevolge was.  Dit wys daar is ‘n rede vir alles en die vak interesseer my regtig baie.  Wiskunde was soms baie frustrerend, maar die gevoel om ‘n baie moeilike Wiskundesom reg te kry of die blydskap wanneer ek uiteindelik ‘n module verstaan, het dit die moeite werd gemaak.  Ek het ook gehou van die feit dat Wiskunde wys dat niks regtig onmoontlik is nie, dit voel net soms so.  Al wat jy moet doen is om ‘n bietjie harder te werk, die antwoorde is daar,” sê sy.

Vir Willie was die toepassingsvakke sy gunstelinge.

“My gunstelingvakke was Fisiese Wetenskappe en IGO.  Hierdie vakke het vir my ‘n meer praktiese leermetode gebied, sowel as alledaagse toepassings. Om te leer vir hierdie vakke is ook aansienlik makliker, aangesien daar relatief min langvrae en skryfwerk is, dit is meestal toepassing.  Ek  hou nie juis baie van literêre langvrae nie,” sê hy.

Sulke goeie uitslae kom natuurlik nie sonder baie toewyding en deeglike voorbereiding nie.  Carien en Willie het elkeen ‘n deeglike plan gehad waarvolgens hulle hul vir die eindeksamen voorberei het.

Volgens Carien het sy baie geleer en ‘n rooster opgestel waarvolgens sy haar werk opgedeel het.

“Ek het my bes probeer om daarby te hou.  Die middae na groot eksamens het ek afgevat as ek genoeg tyd gehad het voor my volgende vraestel om net ‘n bietjie te ontspan.  Ek het ook probeer om niks vir die laaste minuut te los nie en regtig baie vraestelle uitgewerk,” vertel sy.

Willie het die Septembereksamen, waar hulle alreeds bykans oor al die werk vir die jaar geskryf het, as goeie voorbereiding vir die eindeksamen gebruik.

“Nadat ek deeglik vir die Septembereksamen voorberei het, was dit vir my meestal net vraestelle uitwerk en hersiening tot die eindeksamen gewees,” sê hy.

 Dié twee slimkoppe sit egter nie net elke dag met hul neuse in hul boeke nie.  Carien is mal oor lees en hou ook daarvan om vir ontspanning te swem.  Willie geniet dit om tyd saam met sy vriende te spandeer, rekenaarspeletjies te speel en met verskeie elektroniese toestelle te peuter.

Die pad tot by die dux-leerder-troon was egter nie sonder teleurstellings vir Carien nie.  In graad 10 wou sy baie graag erekleure vir  akademie verwerf, maar haar punte aan die einde van die graad was nie hoog genoeg nie.

“Ek dink die teleurstelling dat ek dit net-net gemis het, was seker my grootste struikelblok tot dusver, veral omdat ek geweet het ek sou dit kon kry as ek net ‘n bietjie harder gewerk het vroeër in die jaar,” onthou sy.

Vir Carien is haar grootste motivering om vir die punte waartoe sy in staat is, te werk.

“Ek is baie gelukkig dat my pa ‘n Wiskunde onderwyser was en al van laerskool af bereid was om elke som waarmee ek gesukkel het, te verduidelik.  Dit het gehelp om te besef dat niks eintlik onmoontlik is nie, selfs al voel dit so.  My ma het ook ‘n M-graad in Geskiedenis en sy het regtig baie gehelp om my Geskiedenispunte hoog te hou, veral wanneer sy na my eindelose langvrae geluister het,” vertel Carien.

Volgens Willie motiveer nuwe uitdagings hom.

“Ek hou daarvan om nuwe dinge te leer.  En Carien por my altyd aan om meer te leer, maar dit werk nie altyd nie,” skerts hy.

Beide Carien en Willie gaan hierdie jaar by die Universiteit van Stellenbosch studeer.  Carien gaan LLB Regte studeer, terwyl Willie elektriese en eletroniese ingenieurswese gaan studeer.

Wat is hierdie twee kookwater-slimkoppe se raad aan 2019 se matrieks?

“Moenie enigiets los vir die laaste minuut nie, jy gaan so spyt wees.  Take, opsommings, leerwerk – maak tyd daarvoor.  Leer hard in Junie en September en moenie moed verloor teen die einde van die jaar nie.  En geniet al die laastes,” sê Carien.

“Doen jou bes en leer hard.  Moenie deur die jaar afskeep nie en jou eksamen sal goed gaan,” is Willie se raad.

“Someone else’s success does not preclude your own ability to achieve,” deel Carien, Wellington se top-presteerder van 2018, haar leuse.

Wellington se matriekklas skitter

Trotse Hugenote ouers en leerders vier hul uitslae.

Die jaarlikse matriekuitslae is op Vrydag 4 Januarie bekendgemaak.  2018 se matrieks en hul ouers het in afwagting by die onderskeie plaaslike hoërskole gestaan om hul uitslae, wat om presies elfuur aan die leerders beskikbaar gestel is, te ontvang.

Sommige leerders was opgewonde en nuuskierig oor hul uitslae terwyl ander ‘n bietjie meer benoud voorgekom het.

“’n Mens leer hard en dan skryf jy maar so-so.  Jy weet nooit wat die nasieners van jou antwoorde gaan dink nie.  Ek sal maar onseker voel totdat ek my uitslae netnou in my hande het.  Ek hoop hard, maar is maar bang dat ek miskien teleurgesteld sal wees,” het een van die leerders by Bergrivier Sekondêre Skool laat hoor.

Om elfuur was alle onsekerheid, nuuskierigheid en die lang wag uiteindelik verby.  Die onderskeie skoolhoofde en onderwysers van die plaaslike hoërskole, wat almal reeds die oggend hul skole se uitslae bekom het, het dit aan die leerders uitgedeel.

Alhoewel daar enkele teleurgestelde leerders was, was die oorweldigende emosie onder die matrieks van 2018 een van verligting, blydskap en trots.  Sommige ouers en kinders was selfs in trane van blydskap.  Ouers en leerders het mekaar omhels en gelukgewens en sommiges kon hul uitbundige blydskap beswaarlik bedwing.

“Vanaand vier ons fees!  Ons is bitterlik trots op ons seun wat met universiteitsvrystelling geslaag het!” het een pa gesê.

“Ek het baie hard gewerk en is baie bly oor my A-gemiddelde simbool.  Ek is baie bly dat my harde werk beloon is,” het een van die leerders by Hugenote Hoërskool oorstelp laat hoor.

Die skoolhoofde van Weltevrede Sekondêr, Bergrivier Hoërskool, Wellington Hoërskool en Hugenote Hoërskool is dit eens dat daar in 2018 baie uitdagings was.  Alhoewel die meeste van hulle tevrede is met hul skole se uitslae, weet hulle dat daar hard gewerk sal moet word om al die uitdagings die hoof te bied.

Die gemiddelde slaagsyfer van Weltevrede Sekondêr is 64,2%, dié van Bergrivier Hoërskool is 75,4%, Wellington Hoërskool s’n is 67,6% en Hugenote Hoërskool spog met ‘n 100% slaagsyfer.  Dit beteken dat 77% van Wellington se matrieks die eindeksamen geslaag het - ‘n syfer wat met die provinsiale en nasionale gemiddeld ooreenstem.

Al die skole is baie trots op hul Dux-leerders wat uitstekende prestasies behaal het en wie se deurlopene harde werk in die eindeksamen beloon is.  Salmanique Filander het die beste punte in Weltevrede Sekondêr behaal, Patricia van der Westhuizen was die top-presteerder in Bergrivier Hoërskool, Marcius Petersen het eerste in Wellington Hoërskool geëindig en Carien Rossouw is Hugenote Hoërskool se dux-leerder.  Carien is ook die top-presteerder in die hele dorp.

Hugenote Hoërskool spog met 13 A-gemiddeldes, 82,4% van die leerders wat met volle universiteitsvrystelling geslaag het, 177 vak A-gemiddeldes en 253 vak B-gemiddeldes.  Carien Rossouw, hul top-presteerder, spog met sewe A’s en ‘n gemiddeld van 90,83%.  Kort op haar hakke is haar tweelingbroer, Willie Rossouw, met 86,5%, Martia Odendal met 86,2%, De Villiers Brink met 85,8% en Hannah Bezuidenhout met 85,7%.

Verkeersentrum nou ook op Saterdae oop

Die Drakenstein Munisipaliteit se Daljosaphat Verkeersentrum is, as deel van ‘n toetstydperk, vanaf Saterdag 12 Januarie van 08:00 tot 12:00 oop vir die publiek vir geselekteerde dienste.

Die Munisipaliteit het besluit om die dienste uit te brei omdat hul besef dat dit vir baie inwoners moeilik, of selfs onmoontlik is om die Verkeersentrum gedurende die week te besoek.

Die Daljosaphat Verkeersentrum, wat ook opgegradeer is om meer verbruikersvriendelik te wees, sal die volgende dienste op Saterdae aanbied:

• Registrasie en lisensiëring;

• Hernuwing van bestuurs- en motorlisensies;

• Aansoeke vir leerling- en bestuurslisensies; en

• Afhaal van bestuurslisensiekaarte.

Jou Goeie Nuus - Gratis - Koerant met 'n Verskil in die Swartland - Ons dien en bou © die courant hou kopiereg op alle inhoud van hierdie webwerf en geen deel daarvan mag sonder die bestuur se toestemming gekopieer word nie.