Wellington
Terug na hoofblad

Anje is SA se gimnastiekkampioen

•Jaomi Zeeman

Die 12-jarige Anje Grobbelaar, ‘n leerder van Hugenote Laerskool, het onlangs die Suid-Afrikaanse gimnastiekkampioen in haar afdeling geword.  Met hierdie prestasie bou sy op haar vorige uitstekende prestasies voort.

Anje, ‘n graad 6-leerder, woon sedert 2011 saam met haar gesin op Wellington.  Sy het reeds op 4-jarige ouderdom met Acro-gimnastiek begin en met hul verhuising na Wellington het sy by die Wynland Gimnastiekklub in die Paarl aangesluit en na artistiese gimnastiek oorgeskakel.

Anje verduidelik dat artistiese gimnastiek uit 4 apparate bestaan wat vloer, brug, balk en spronge behels.  Sy neem tans op Level 7 deel en oefen 6 dae per week, gemiddeld 4 ure per dag.  Hulle oefen ook tydens skoolvakansies.

Sy het reeds aan die einde van die 2017-seisoen aan die elemente en bewegings wat Level 7-deelname vereis, begin oefen.

“Dit neem van November tot Junie om die nuwe moeilikheidsgraad te bemeester.  Ons eerste kompetisie is Distrikte.  Daarna moet jy tot WP kwalifiseer en dan tot SA’s,” verduidelik sy.

Anje het vroeër vanjaar ook in die buiteland aan gimnastiekkompetisies deelgeneem en internasionale afrigting ontvang.

“Ek het in die Junie-vakansie saam met my gimnastiekklub ‘n toer na Malta, ‘n eiland naby Italië, meegemaak.  Ons was 13 gimnaste en 5 afrigters en die toer het 10 dae geduur.  Die toer het uit 2 dae se kompetisie en 4 dae se internasionale afrigting saam met ander lande se gimnaste bestaan.  Daar was darem ook genoeg tyd om te ontspan en vakansie te hou en ons het die Pompeye Village besoek, in die blue lagoon geswem en ‘n waterspeelpark besoek,” vertel sy oor hierdie ervaring.

Haar onlangse kroning as SA-kampioen is nie die eerste keer dat sy op hierdie vlak presteer nie.

Anje was ook in 2014 die SA-kampioen, in 2015 vyfde in Suid-Afrika en in 2016 derde.  Volgens haar is sy mal oor hierdie sportsoort.

“Ek hou daarvan omdat dit ‘n baie uitdagende sportsoort is.  Dit vereis baie dissipline, toewyding, deursettingsvermoë en konsentrasie.  Dis ‘n baie goeie manier om van energie ontslae te raak en jy leer ook die vermoë aan om interessante bewegings met jou lyf te doen,” verduidelik sy.

Anje is ‘n veelsydige sportvrou wat ook al op nasionale vlak in atletiek meegeding het.  Sy het in 2016, 2017 en 2018 die WP-atletiekspan by die Suid-Afrikaanse Atletiek Kampioenskappe in hoogspring verteenwoordig.

“Ek hou baie van atletiek, akademie en spansporte soos hokkie en netbal, maar kon ongelukkig nie hierdie jaar aan spansporte deelneem nie as gevolg van die  druk gimnastiek oefenprogram.  Ek hoop om  volgende jaar weer tyd te maak vir span- en ander individuele sportsoorte,” sê sy.

Om die nasionale kampioen in gimnastiek te wees, is nie iets wat sonder uitdagings en struikelblokke bereik kan word nie.

“Ek moes baie opofferings maak en sekere dinge los om op my gimnastiek te fokus.  Ek moes die vrees vir hoogtes en om te val en seer te kry, oorkom.  Wanneer jy nuwe elemente moet aanleer, val jy nogals gereeld.  Jy kan ook sportbeserings en ooreiste spiere opdoen.  Ek moes al baie my vakansies opoffer om te oefen.  Tydens kompetisies is die druk baie hoog en een fout op ‘n apparaat  kan jou baie punte kos,” vertel sy.

Die Olimpiese gimnastiekkampioen, Simone Biles, is Anje se rolmodel.

“Sy sê altyd: ‘Remember to have fun.  When I am smiling and having fun, I perform best’,” laat sy hoor.

Anje se raad aan kinders wat aan gimnastiek wil deelneem, is op die man af.

“Gimnastiek is baie lekker en baie uitdagend.  Weet net dat dit baie dissipline en opofferings vereis as jy goed wil wees.”

Intussen droom sy groot drome.

“My droom is om voluit aan sport deel te neem en dieselfde toewyding aan my akademie te gee, om hard te werk en alles te geniet wat ek doen,” laat hierdie gefokusde jong Nasionale Gimnastiekkampioen hoor.

Jou Goeie Nuus - Gratis - Koerant met 'n Verskil in die Swartland - Ons dien en bou © die courant hou kopiereg op alle inhoud van hierdie webwerf en geen deel daarvan mag sonder die bestuur se toestemming gekopieer word nie.